Tuia te Ako 2010 – He Hui Mātauranga Matua

Mā te hui nei, mā Tuia te Ako e whakahuihui te whānau Māori mai i ngā tōpito katoa o te rāngai mātauranga matua kia noho tahi ki te wānanga, ki te kōrerorero hoki i te huinga o ngā kaupapa e pā nei ki te angitu o ā tātau ākonga mātauranga matua Māori.

Ka hāngai te hui tuatahi ki ngā kaupapa matua e whā. Mā ētahi o ō tātau rangatira, kaiako tohunga hoki o te mātauranga matua Māori e whakapuaki ō rātau whakaaro mō ngā kaupapa matua kei raro iho.

• Rangatiratanga – he aha te rangatiratanga ki te rāngai mātauranga matua Māori? Me pēhea hoki tātau e whakakaha i a tātau?
• Ahu Whakamuatanga – he aha te pānga, te hāngaitanga rānei o te mātauranga matua Māori ki ngā tūmanako o te iwi? He mea nui tēnei? Me pēhea hoki tātau e mahi tahi me ngā whānau, ngā hapū, ngā iwi me ngā rōpū Māori kia ea ō rātau wawata?
• Whakawhitiwhiti Whakaaro – ka pēhea tātau e whakawhitiwhiti whakaaro kia puta ai he hua? He aha hoki te wāhanga o tēnei taonga ki te ahu whakamuatanga o te kaupapa?
• Whakawhanaungatanga – e āhei ana ngā Māori huri noa i te motu te mahi tahi ahakoa te tautohetohe, te rerenga kētanga me ngā wero nui o te rāngai mātauranga matua kia puta he painga ki te katoa?

Ka tukua e Tuia te Ako he wānanga e kōrerorerotia ai he take matua, he putanga rangahau, he kōkiri hou me ngā nekenekehanga hou mai i te whānuitanga o te rāngai.

Ko te tikanga o ngā awheawhe me ngā whakaaturanga he whakaatu i ngā urupare auaha a te whānau mātauranga Māori matua ki ngā wero o te rāngai me te tuku i te wā whakaputa, whakawhitiwhiti whakaaro hoki ki ngā māngai ka tae ki te hui.

I tēnei wā, ko Tā Mason Durie (Ngāti Rangitane) rāua ko Te Ahorangi Linda Smith (Ngāti Awa, Ngāti Porou) ngā rangatira i whakaae ki te tuku whakaaturanga matua. Mā te wā pea ka whakaae mai ētahi anō.

Ā ngā rā tata nei, ka tuwhera te tatau kia rēhita mai koutou.

Hoki mai ki te tirotiro i tēnei whārangi i ia wā.

Nau mai, haere mai tātau katoa.